Mèrcuris passau s’imputau de s’omicìdiu de Giovanni Musu, s’òmini de 53 annus chi is pompieris ant agatau mortu faci a is 4 de chitzi su
17 de gennàrgiu in su parcu de Rosmarino, at cunfessau ananti de su giugi Giorgio Altieri.
S’imputau est William Serra, 38 annus, carboniesu e, che sa vìtima etotu, fiat persona giai connota a is Fortzas de s’Òrdini.
S’òmini fiat in su presoni de Uda de chi is Carabineris dd’iant firmau in domu sua lunis a mengianu passau, esecutendi s’ordinàntzia de
custòdia cautelari firmada de su GIP.
Is imputus asuba de Serra funt grais meda: omicìdiu premeditau, sderrobatòriu agravau e distrutzioni tentada de cadàveri.
Is militaris de sa Cumpangia de Carbònia, cun su sustènniu de su Nùcleu Investigativu de su Cumandu Provintziali de Casteddu, ant fatu atividadi de scrucullu pretzisa meda: ant interrogau unas cantu personas, analizau tabulaus telefònicus e averiguau is telecàmeras de siguresa spainadas in citadi chi ant permìtiu de cumprendi is movimentus de sa vìtima e de s’agressori presuntu.
In custa manera is inchisidoris ant otentu unu cuadru probatòriu <<gravi e cunvergenti>>.
Duncas Serra at ammìtiu de ai mortu a Musu e at dimandau scusa a is parentis ma no at nau poita dd’at fatu.
A su chi est bessiu a pillu de s’indàgini Musu iat a depi essi andau a su parcu de Rosmarino po una bèndida de sustàntzias narcòticas. Lòmpiu a inias parit chi William Serra dd’apat afracau e mortu a stocadas (in s’autopsia ant agatau is sinnialis de 13 fertas e intr’e custas
una sa gorguenna chi est assèria fadali) e parit puru chi avatu ndi dd’apat pigau su portafòlliu e innaits
de si fui apat circau de donai fogu a su corpus oberendi una busta de àliga chena de nci arrinnesci, fintzas poita ca is pompieris chi funt
intervènnius a lestru e luegus ant avisau a is carabineris de sa scoberta arrorosa chi at fatu spantu mannu meda in Carbònia.
Articolo di Roberto Pinna
